Ez da emandako hitza betetzean ez duen horietakoa, beharbada horregatik izan da harrigarriagoa berriro ere futbol zelaietan ikustea, baina Paul Scholes itzuli egin da. Ez edozein tokitan, ezta edozein unetan ere: Manchester Cityren aurka eta bere betiko taldea sufritzen ari zen unean –Championsetik kanpo, Newcastlen aurka jipoia jaso eta gero eta jokalariak bat bestearen atzetik erizaindegira doazelarik–.

Iragan denboraldiaren amaieran iragarri zuen futbola utziko zuela eta Alex Fergusonek ezin izan zion ideia burutik kendu. Baina, hala ere, Uniteden ordezkoekin entrenatzen jarraitu du eta, azkenean, taldearen beharrek eta futbolaren hausberoak ezin amatatuak egun batetik bestera taldera itzultzea ekarri du. Ez du girotzeko lan handirik egin beharko beti bere taldea izan den horretan buru-belarri sartzeko.

Debuta ez da bikaina izan. Auzoko zaratatsuen –noisy neighbours deitu zien Fergusonek– kontra bigarren zatian jauzi egin zuen zelaira eta berak galdutako baloi batek ekarri zuen citizenen bigarren gola. Hala ere, Fergusonek partidako erritmoa ezeztatzeko atera zuen eta entrenatzaileak agindutakoa, beti bezala, bete zuen: emandako paseen %97 zegokien tokira iritsi ziren.

Hausnarketa ez da askorik luzatu Rick Perry hautagairen kasuan. Michelle Bachmannen hutsuneari Texaskoarena gehituko zitzaiola uste zuten batzuek, baina twitterren iragarri du ez duela, momentuz, etsiko. Hori bai, New Hampshireko hitzorduan ez du parte hartuko eta South Caroline estatura bideratuko ditu bere ahaleginak.

Abiatu da Barack Obama presidenteari nor lehiatuko zaion erabakitzeko AEBetako alderdi errepublikarraren hautaketa prozesua. Iowako caucusean Mitt Romney –%24,6– nagusitu zaio Rick Santorumi –%24,5–, baina alde oso txikia izan da bien artean: zortzi boto. Hori zenbaki hotzei dagokienean. Izan ere, lehendabiziko urratsean Santorum izan da ustegabekoa. Egun bat lehenago egindako boto proiekzioek bere irabazteko aukerak %20 zirela adierazten zuten, Romneyrenak haren bikoitza, baina goranzko joera aipagarria zekarrela erakusten zuten.

Hasi besterik ez da egin errepublikarren hautagaia zehazteko bidea, baina utzi ditu lehendabiziko aztarnak. Mitt Romney, soslairik leunena duen hautagaia izan da nagusi, hala ere, ezin izan du askorentzat faborito izateko beharko lukeen nagusitasuna erakutsi. Lepoan somatzen du Massachussets estatuko ordezkariak Rick Santorum, lehiakideetan kontserbadoreena eta Tea Partyk azken hilabeteetan hartu duen indarra ondoen ordezkatuko lukeena. Ia 300 ekitaldi egin ditu Iowan azken boladan eta emaitzetan agerian geratu da hori. Ron Paul izan da hirugarrena, bera eta Newt Gingrich, azken boladan bere kontrako kanpaina jasan eta gero behera egin duen arren, aurreko biek bidean huts egingo balute prest izango dira haien lekua hartzeko.

Lehendabiziko urratsetik mailatuta atera dira Rick Perry eta Michele Bachmann. Perryk Texasera itzuli eta lehian jarraituko duen ala ez hausnartu behar duela jakinarazi du. Bachmann, ostera, duela hilabate batzuk faboritoetako bat izan zitekeela aurrikusten bazen ere, indarra galduz joan da Iowan babes gutxien jaso duen hautagaia bihurtzeraino. Jon Huntsmanek, Herman Cainek eta Buddy Roemerrek eskukada bana boto besterik ez dute erdietsi.